काठमाडौं । कैलालीको चुरे गाउँपालिका–५ भासु भीर क्षेत्र मन्दिर नजिकै भएको मोटरसाइकल दुर्घटनामा परी गम्भीर घाइते भएका डोटीका एक युवकको ज्यान गएको छ ।

अत्तरीया स्याउले जोड्ने भीमदत्त राजमार्गमा तराईबाट पहाडतर्फ आउदै गरेको से ६ प ८७२१ नम्बरको मोटरसाइकल शुक्रवार साँझ दुर्घटना हुँदा मोटरसाइकल चालक डोटीको जोरायल गाउँपालिका–१ का १९ वर्षीय भीमबहादुर बिक गम्भीर घाइते भएका थिए ।

घाइते बिकको आज शनिवार उपचारको क्रममा ज्यान गएको सुदूरपश्चिम प्रदेश प्रहरी कार्यालयले जनाएको छ । घाइते बिकको पदमा अस्पताल अत्तरीयामा उपचार हुन नसकेपछि निसर्ग अस्पताल धनगढीमा रिफर गरिएको थियो ।

यसैगरी दुर्घटनामा घाइते भएका मोटरसाइकल पछाडी बसेका ४५ वर्षीय ओमप्रकाश सुनारको पनि पदमा अस्पतालमा उपचार हुन नसकेपछि अहिले निसर्ग अस्पताल धनगढीमा उपचार भइरहेको छ । यस सम्बन्धमा प्रहरीले थप अनुसन्धान गरिरहेको जनाएको छ ।