काठमाडौं । जनता समाजवादी पार्टी नेपाल (जसपा) ले आफ्ना मन्त्रीहरुलाई फिर्ता बोलाएको छ । जसपाले आफ्ना ३ मन्त्रीलाई फिर्ता बोलाएर नयाँको नाम सिफारिस गरेको हो ।

जसपाले कृषिमन्त्री महिन्द्रराय यादव, भौतिक पूर्वाधारमन्त्री रेणुकुमारी यादव र वन तथा वातावरण मन्त्री रामसहायप्रसाद यादवलाई फिर्ता बोलाउने निर्णय गरेको हो ।

जसपाले पठाएको नयाँ मन्त्रीहरुको सूचीमा सामान्य प्रशासन मन्त्रालयमा राजेन्द्र श्रेष्ठ, भौतिक पूर्वाधार मन्त्रालयमा मोहम्मद इस्तियाक राई, कृषि तथा पशुपन्छी मन्त्रालयमा मृगेन्द्रकुमार सिंह र वन मन्त्रालयमा प्रदीपकुमार यादव रहेका छन् ।

अध्यक्ष उपेन्द्र यादवले प्रधानमन्त्री शेरबहादुर देउवालाई भेटेर नयाँ मन्त्रीहरू सूची दिएका हुन् । नयाँ मन्त्रीहरुको सपथ सोमबार नै हुने भएको छ ।