कैलाली २२ बैशाख : प्रमुख प्रतिपक्षी नेकपा एमालेका अध्यक्ष केपी शर्मा ओलीले वर्तमान पाँच दलीय गठबन्धन आफ्नो मान्छेको उद्धार गर्न र बाँडीचुँडी खान मात्रै बनेको आरोप लगाएका छन् ।

कैलालीको बौनियामा आयोजित चुनावी सभालाई सम्बोधन गर्दै अध्यक्ष ओलीले गठबन्धनको गन्तव्य र उद्देश्य केहि नभएको बताए । ‘खाली सरकारमा पुग्ने, सरकारमा पुगेपछि आफ्ना मान्छेलाई उद्धार र व्यवस्थापन उद्धार गर्ने,’ ओलीले भने, ‘नातागोता आफन्तहरुको उद्धार गर्ने र बाँडीचुँडी खाने, त्यसका लागि मात्र अहिलेको यो गठबन्धन हो ।’

‘यो गठबन्धन जनताको आदेशबाट होइन, आज २७५ र १६५ भएको ठाउँमा नेपाली कांग्रेसले २३ सिट ल्याएको थियो,’ ओलीले भने, ‘२३ सिट ल्याएको कांग्रेसका अध्यक्षले अन्य ढोडका लौरी बटुलेर सरकार बनाएका छन् ।’ यो सरकार परमादेशी भएको भन्दै संविधान विपरीत भएको आरोप लगाए । ओली कैलाली र कञ्चनपुरमा आयोजित चुनावी सभालाई सम्बोधन गर्न सुदूरपश्चिम पुगेका छन् ।