काठमाडौं, १४ जेठ नेकपा एमाले अध्यक्ष तथा प्रधानमन्त्री केपी शर्मा ओलीले पार्टीको एकता जोगाउन आफूले हर प्रयास गरेको बताउनु भयो ।

शुक्रबार राष्ट्रका नाममा सम्बोधन गर्दै प्रधानमन्त्री ओलीले पार्टीमा अन्त्यहीन गुटको थलो बनाउने केही नेताका कारण फ्लोर क्रस, पार्टीका आधिकारिक उम्मेदवारलाई हराउन विपक्षीसँग साँठगाँठ गर्ने, साझा उम्मेदवारका नाममा बागी उठाउने र आफ्नो संसदीय दलका नेतालाई हटाउन कहिले अनुपस्थित हुने जस्ता गतिविधि अराजकताका रुपमा मौलाएको बताउनु भयो ।

‘नेकपा एमालेलाई नै एकीकृत विरासतको रुपमा अघि बढाउने प्रयत्न ग¥यौँ तर कतिपय नेताहरुमा गल्तीको बोध भएन’, प्रधानमन्त्रीले सम्बोधनका क्रममा भने, ‘प्रतिनिधि सभा पुरै समय चलोस् भनेर गरेको प्रयासलाई सफल हुन दिइएन । राजनीतिक स्थायित्वको मुल पक्ष नीतिगत संगति, निर्णयको निरन्तरता र कार्यान्वयनको सुनिश्चितता हो ।’

उनले राजनीतिक स्थायित्वको केन्द्रविन्दु राष्ट्र र जनताको हित र संरक्षण संवर्द्धन भएको भन्दै आफूले जनताको हित हुने पार्टी एकताको लागि प्रयास सार्वजनिक भएको भन्दै नेकपा एकता कायम गर्न समेत अन्तिम समयसम्म प्रयास गरिएको दावी गरे । उनले अस्थिरता सिर्जनाका लागि स्वार्थकेन्द्रित गठबन्धन नबनेको भए र महाधिवेशनबाट निर्वाचित अध्यक्ष घेराबन्दीबाट हटाउने दुरासय नभएको भए यतिवेला एकता महाधिवेशनमा गएर नेतृत्व हस्तान्तरण भइसकेको हुने छ ।