हेटौंडा ८ जेठ :  नेकपा एमालेले काभ्रेका सांसद लक्ष्मण लम्साल र बसुन्धरा हुमागाई सहित १४ सांसदलाई २४ घण्टे स्पष्टीकरण सोध्ने निर्णय गरेको छ । माधव नेपाल समूहका १४ प्रदेशसभा सदस्यलाई स्पष्टीकरण सोध्ने निर्णय गरेको हो ।

एमाले बागमती प्रदेश संसदीय बोर्डको शनिबार बसेको बैठकले राष्ट्रियसभा उपनिर्वाचनमा पार्टीका उम्मेदवार रामबहादुर थापा बादललाई हराउन भूमिका खेलेको भन्दै नेपाल समूहका १४ प्रदेशसभा सदस्यलाई २४ घण्टे स्पष्टीकरण सोध्ने निर्णय गरेको मुख्य सचेतक दीपक निरौलाले जानकारी दिए । मुख्य सचेतक निरौलाका अनुसार आइतबार बेलुका ५ बजेसम्म स्पष्टीकरण बुझाउने समयसिमा तोकिएको छ ।

प्रदेशसभा सदस्यहरु अष्टलक्ष्मी शाक्य, राजेन्द्रप्रसाद पाण्डे, अरुणप्रसाद नेपाल, रचना खड्का, कुसुमकुमार कार्की, मनु सिग्देल, बसुन्धरा हुमागाईं, लक्ष्मण लम्साल, इन्द्रमाया गुरुङ, कृष्णप्रसाद खनाल, वसन्त मानन्धर, शान्तिप्रसाद पौडेल, पार्वती सिलवाल र मीना ज्ञवालीलाई स्पष्टीकरण सोधिएको छ ।