काठमाडौँ, १३ चैत्र । नेकपा एमालेका अध्यक्ष एवं प्रधानमन्त्री केपी ओलीले फागुन २८ पछिका निर्णय फिर्ता नहुने अडान कायमै राखेका छन् । प्रधानमन्त्री निवास बालुवाटारमा शुक्रबार बसेको संसदीय दलको बैठकमा अध्यक्ष ओलीले फागुन २८ यताका कुनै पनि निर्णय फिर्ता नहुने स्पष्ट पारेका हुन् । प्रधानमन्त्री ओलीले बैठकमा फागुन २८ यताका निर्णय फिर्ता नहुने प्रष्टसँग राखेको मुख्य सचेतक विशाल भट्टराईले बताए ।

बैठकमा प्रधानमन्त्री ओलीले माधव नेपाल र भीम रावलले बुझाएको स्पष्टीकरण पनि चित्तबुझ्दो नभएको भन्दै कारबाहीको संकेत गरेका छन् । अध्यक्ष ओलीले नेपाल र रावलले बुझाएको स्पष्टिकरण कारवाहीको भागिदार योग्य भएको जानकारी दिएका छन् । प्रमुख सचेतक भट्टराईका अनुसार कारबाही कुन प्रकृतिको हुने भन्ने केन्द्रीय समितिबाट तय हुनेछ ।

बैठकमा सहभागी खनाल–नेपाल समूहका सांसदहरुले भने पार्टीलाई २०७५ जेठ २ गते अगाडिको अवस्थामा लगेर एकता कायम राख्नुपर्ने सुझाव अध्यक्ष ओलीलाई दिएका थिए । बैठकमा वरिष्ठ नेता झलनाथ खनाल, घनश्याम भुसाल, योगेश भट्टराई र गोकर्ण विष्टले पार्टीलाई एकताबद्ध बनाउन भूमिका खेल्न आग्रह गरे पनि अध्यक्ष ओलीले त्यसप्रति नरम हुने कुनै संकेत दिएनन् । बैठकमा वरिष्ठ नेता माधवकुमार नेपाल र भीम रावल भने सहभागी भएनन् ।