काठमाडौँ २९ फागुन । नेकपा एमालेका अध्यक्ष एवं प्रधानमन्त्री केपी ओलीले आफूलाई सरकारबाट हटाए पनि बीस महिनापछि दुई तिहाइ बहुमतका साथ सिंहदरबार प्रवेश गर्ने बताएका छन् । एमालेको भातृ संगठन अखिल नेपाल महिला संघको राष्ट्रिय भेलालाई शनिवार भृकुटीमण्डपमा सम्बोधन गर्दै अध्यक्ष ओलीले आफुलाई प्रधामन्त्रीबाट हटाएर देखाउन चुनौती दिँदै हटाए पनि जनताले दुई तिहाइ बहुमतका साथ सिंहदरबार प्रवेश गराउने बताएका हुन् ।

प्रतिपक्षमा बस्न आफू तयार रहेको भन्दै प्रधानमन्त्री ओलीले भने ‘हामीलाई प्रतिपक्षमा एकछिन रहन कुनै गाह्रो छैन । प्रतिपक्षमा पनि बस्न तयार । हामी सरकारमा भए देश बनाउँछौँ, प्रतिपक्षमा भए देश बनाउने तयारी गछौँ ।’

प्रधानमन्त्री ओलीले माधव–झलनाथ पक्षलाई कतैबाट नहटाएको भन्दै पार्टीको काम गर्दै गर्नलाई केहीलाई जिम्मेवारी दिइएको प्रष्टोक्ति समेत दिएका छन् । अहिले पार्टी चलाउँदै गर्नका लागि केही साथीहरुलाई केही कामको जिम्मा दिँदैमा दलिनमा टाउको ठोकिने गरी किन उफ्रिराख्नु भएको भन्दै प्रधानमन्त्री ओलीले चैत्र ७ गतेको बैठकको माधव–झलनाथ पक्षलाई निम्तो समेत दिएका छन् । प्रधानमन्त्री ओलीले बैठक नआए विधानअनुसार कारबाही हुने चेतावनी पनि माधव–झलनाथ पक्षलाई दिएका छन् ।

प्रधानमन्त्री ओलीले चेतावनीको भाषामा भनेका छन्– ‘२०७७ साल चैत्र ७ गते केन्द्रीय कमिटीको बैठक बालुवाटारमा बोलाएको छु । केन्द्रीय कमिटीका सदस्यहरु आउनुहोला । अनुपस्थित रहदै जानुभो भने विधानको व्यवस्था अनुसार हुँदै जानेछ । त्यसकारण म सबैले सुन्नेगरी भन्न चाहान्छु ७ गतेको बैठकमा आउनुहोला ।’