काठमाडौँ १५ फागुन । प्रधानमन्त्री केपी ओलीले नेत्रविक्रम चन्द ‘विप्लव’ नेतृत्वको नेकपा शान्ति प्रक्रियामा आएसँगै मुलुक शान्तिको युगमा प्रवेश गरेको बताएका छन् । शुक्रबार विप्लव समूहसँग शान्ति सम्झौतामा हस्ताक्षर भएपछि प्रधानमन्त्री ओलीले अब देशमा कुनै पनि प्रकारको द्वन्द्व नरहेको भन्दै नेपाल शान्ति युगमा प्रवेश गरेको बताएका हुन् ।

शान्तिपूर्ण राजनीतिमा आउने नेकपा चन्द समूहको कदमलाई साहसिक कदमको संज्ञा दिँदै प्रधानमन्त्री ओलीले महासचिव नेत्रविक्रम चन्दले नेपाली जनताको मन जितेको बताए ।

हस्ताक्षर कार्यक्रममा विप्लवको निकै प्रशंसा गरेका प्रधानमन्त्री ओली नेकपा दाहाल–नेपाल समूहप्रति भने निकै आक्रामक रुपमा प्रस्तुत भए ।

आफूहरुले कसैलाई प्रधानमन्त्री बनिदेउ भनेर प्रस्ताव नगरेको स्पष्ट पार्दै प्रधानमन्त्री ओलीले पुष्पकमल दाहाल र माधव नेपाल आफ्नो प्रधानमन्त्री हटाएर अरुलाई प्रधानमन्त्री खाइदेउ भन्दै किस्तीमा पद लिएर हिँडेको टिप्पणी गरे । प्रधानमन्त्री भने– ‘आफ्नो दुई तिहाई भाँडेर, भत्काएर छोड्ने । आफ्नो प्रधानमन्त्री हटाएर छोड्ने । किस्तीमा प्रधानमन्त्री लिएर खाइदिनुस् न खाइदिनुस् भन्न अन्त जाने ।’