काठमाडौँ, १५ फागुन । नेकपाका अध्यक्ष पुष्पकमल दाहाल प्रचण्डले प्रधानमन्त्री केपी ओलीबाट पीडित हुन थालेपछि आफूले माधव नेपालसँग सहकार्य अगाडि बढेको बताएका छन् ।

शनिबार ललितपुरको जाउलाखेलमा शिक्षकहरूको राष्ट्रिय भेलालाई सम्बोधन गर्दै अध्यक्ष दाहालले नेता नेपाललाई जस्तै आफूलाई पनि प्रधानमन्त्री ओलीले पेल्न थालेपछि दुई नेताबीच सहकार्य भएको स्पष्ट पारेका हुन् । माधव नेपाललाई निमोठेर सिध्याउने र मलाई किचिक्क पार्छु भन्ने ओलीको रणनीति आफूले एक महिनापछि मात्रै बुझेको दाहालको भनाइ छ ।

कार्यक्रममा नेकपा दाहाल नेपाल समूहका अध्यक्ष माधव नेपालले बालुवा पेलेर तेल निस्किनु र केपी ओली सुध्रिनु एउटै भएको टिप्पणी गरेका छन् । उनले ओलीको सबैभन्दा पहिला राजीनामा माग्ने वामदेव गौतमले सुधार्न कोसिस गरिरहेकोमा आफूलाई आश्चार्य लागेको समेत बताए ।

अध्यक्ष नेपालले अव ओलीसँग एकताको कुनै सम्भावना नभएको पनि स्पष्ट पारे । ओलीका मानिसहरुको आँखामा बाम लगाएर निकालेको आँशुको कुनै अर्थ नभएको भन्दै नेपालले आन्दोलनमा सहभागि भएकाहरुलाई साथमा लिएर संयुक्त सरकार बनाउनेसमेत स्पष्ट पारे ।