काठमाडौँ, १४ फागुन । उपप्रधानमन्त्री एवं नेकपा ओली समूहका नेता ईश्वर पोखरेलले प्रधानमन्त्री केपी ओलीलाई अविश्वासको प्रस्ताव ल्याएर हटाउन चुनौतीसमेत दिए । अनेरास्ववियूले शुक्रबार काठमाडौंको आरआर क्याम्पसमा आयोजना गरेको भेलामा उपप्रधानमन्त्री पोखरेलले कसैले भन्दैमा जनताले विश्वास गरेको प्रधानमन्त्री ओलीले राजीनामा नदिने भन्दै अविश्वासको प्रस्ताव ल्याएर हटाएर देखाउन चुनौती दिएका हुन् ।

प्रतिनिधि सभा विघटनको निर्णय बदर गर्ने अदालतको फैसलाप्रति असन्तुष्टि जनाउँदै उपप्रधानमन्त्री पोखरेलले अदालतले मुलुकको राजनीतिलाई पुरानै फोहोरी खेलमा धकेलेको आरोपसमेत लगाए । उनले सबैभन्दा ठूलो अदालत सर्वोच्च नभई जनता भएको जिकिर समेत दिए ।

कार्यक्रममा नेकपा ओली पक्षका नेता एवं ऊर्जामन्त्री टोपबहादुर रायमाझीले संसद पुनःस्थापना भएपछि खुसी भएर लड्डु बाँड्नुको कुनै अर्थ नरहेको बताए । प्रचण्ड र माधव नेपाल कुनै पनि हालतमा प्रधानमन्त्री हुन नसक्ने भन्दै रायमाझीले दुई वर्ष थप सांसद हुन पाएकोमा लड्डु खाएको टिप्पणी गरे ।