काठमाडौँ, २ फागुन । नेकपा दाहाल नेपाल समूहले प्रतिनिधि सभा विघटन विरुद्ध थप आन्दोलनको घोषणा गरेको छ । पार्टी कार्यालय पेरिसडाँडामा आइतबार पत्रकार सम्मेलन गरेर फागुन ५ देखि १५ गतेसम्म चौथो चरणको आन्दोलन घोषणा गरेको हो ।

दाहाल नेपाल समूहले फागुन ६ गते प्रतिगमन, महँगी र भष्ट्राचारको विरोधमा काठमाडौंको टुँडिखेल वरीपरी मानव साङ्लोसहितको विरोध कार्यक्रम तय गरेको छ । त्यस्तै फागुन ५ देखि १२ गतेसम्म जिल्लास्तरीय विरोध प्रदर्शन र सभा गर्ने जनाएको छ ।

यसैगरी दाहाल नेपाल समूहले फागुन ८ गते प्रतिगमनविरुद्ध बृहत् अन्तरक्रिया र ९ गते महिला हिंसा, बलात्कारविरुद्ध देशव्यापी महिलाहरुको विरोध कार्यक्रमको घोषणा पनि गरेको छ । फागुन १२ गते चितवन, फागुन २१ गते दाङ, जनकपुर, नेपालगञ्ज, लगायतका शहरहरूमा विरोध प्रदर्शन गर्ने जनाएको छ ।