भद्रपुर १८ मंसिर  :  झापामा अज्ञात समूहद्वारा उपमेयर चढेको गाडी जलाउने प्रयास असफल भएको छ। मेचीनगर नगरपालिकाका उपमेयर मीना उप्रेती चढेको मे१झ १७२ नम्बरको गाडी बिहीबार दिउँसो अज्ञात समूहले जलाउने प्रयास गरिएको झापा प्रहरीले जनाएको छ ।

प्रहरी कार्यालय झपाका डिएसपी राकेश थापाका अनुसार मोटरसाइकलमा आएका दुई जना युवाले त्यो गाडी जलाउने प्रयास गरिएको प्रारम्भिक अनुसन्धानबाट खुलेको डिएसपी थापाले बताए। चारआलीस्थित नेपाल आयल निगम डिपो कार्यालयको कार्यक्रममा सहभागी भएर फर्किने क्रममा धाइजन नजिकै मोटरसाइकलले गाडी छेकेर युवाद्धयले चक्कामा पेट्रोल छर्किएको आगो लगाउने प्रयास गरेका थिए।

गाडीभित्र उपमेयर मीना र उनका चालक सवार थिए। उपमेयरलाई ती युवाद्धयले आफूहरू नेपाल विद्यार्थी सङ्घको कार्यकर्ता भएको बताएका थिए। घटनाको विषयमा इलाका प्रहरी कार्यालय काँकडभिट्टाले अनुसन्धान थालिसकेको डिएसपी थापाको भनाई छ।