काठमाडौं ६ मंसिर :  नेपालमा पछिल्लो २४ घन्टामा थप एक हजार ६ सय ७४ जनामा कोरोना संक्रमण पुष्टि भएको छ ।

स्वास्थ्य तथा जनसंख्या मन्त्रालयले दिएको जानकारीअनुसार शनिबारसम्ममा कोरोना संक्रमितको संख्या दुई लाख १८ हजार ६ सय ३९ पुगेको छ ।

काठमाडौं उपत्यकाका तीन जिल्लामा तीन सय ८७ महिला र पाँच सय १२ पुरुष गरी ८९९ जनामा कोरोना संक्रमण देखिएको मन्त्रालयले जनाएको छ ।

त्यस्तै पछिल्लो २४ घन्टामा दुई हजार तीन सय २३ जना कोरोना संक्रमित निको भएका छन्। योसँगै निको हुनेको संख्या एक लाख ९३ हजार तीन सय २५ पुगेको छ ।

यसैगरी काभ्रेका कोरोना भाईरसका संक्रमित मध्ये आज १५ जना डिस्चार्ज भएका छन् । यो संगै जिल्लाका संक्रमित मध्ये हाल सम्म एक हजार आठ सय ८० जना निको भएका स्वास्थ्य कार्यालय काभ्रेले जनाएको छ । आज जिल्लामा २६ जना संक्रमित थपिएका छन् ।

बनेपा नगरपालिकाका ५ जना महिला र ४ जना पुरुष,धुलिखेल नगरपालिकाका ६ जना महिला र ४ जना पुरुष,पाँचखाल र मण्डनदेउपुर नगरपालिकाका १/१  जना महिला ,रोशी गाँउपालिकाका २ पुरुष , तेमाल र चौरीदेउराली गाँउपालिकाका १,१ जना पुरुषमा भाईरसको संक्रमण पुष्टि भएको कार्यालयका प्रमुख डाक्टर नरेन्द्र कुमार झाले बताउनुभयो ।

योसँगै जिल्लामा संक्रमितको संख्या २ हजार ३ सय ५९ पुगेको छ । जिल्लामा हाल ४ सय ४६ जना सक्रिय संक्रमित छन् । उनीहरुमध्ये अस्पताल आइसोलेसनमा १७ जना र होम आइसोलेसनमा ४ सय २९ जना रहेका डाक्टर झाले बताउनुभयो । भाईसरका कारण जिल्लाका ३३ जनाको ज्यान गईसकेको छ ।