धुलिखेल, २६ कात्तिकः धुलिखेल नगरपालिकाले सुबिधा सहित सेवा निबृत्त हुन लागेका शिक्षकलाई सम्मान सहित बिदाई गरेको छ । नगरपालिकाभित्र अध्यापन गराइ सेवा निबृत हुने लागेका १० जना शिक्षकहरुलाई आज सम्मान सहित विदाई गरिएको नगरपालिकाका शिक्षा शाखाले जनाएको छ ।

शिक्षा शाखाका अधिकृत भोजकुमार ठकुरीका अनुसार निबृत्त हुन लागेका शिक्षकहरुको बिदाईसँगै नगरपालिकामा दरबन्दी मिलान गर्न थप सजिलो हुने भएको छ । २० वर्ष शिक्षण पेशामा बिताइसकेका शिक्षकहरुलाई समयाबधिको आधारमा १ लाखदेखी १ लाख ७५ हजार सम्म टोकनमनी सहित बिदाइ गरिएको हो ।

विदाई शिक्षकले कात्तिक महिनाको तलब प्राप्त गर्नुहुनेछ भने मंसिर १ गतेबाट पद रिक्त हुनुपर्ने छ । निबृत्त भएर बिदाई हुन चाहाने शिक्षकका लागि नगरपालिकाले २ पटक सूचना निकालेको थियो । नगरपालिकामा २ सय ९७ जना शिक्षक रहेकोमा दरबन्दी मिलान गर्दा अझै ८१ जना शिक्षक संख्या घटाउनुपर्ने छ । आधारभुत तहको लागि समेत दरबन्दी आवश्यक पर्ने भएकाले नगरपालिकाले हाल ४७ जना मात्र शिक्षक घटाउने निर्णय गरेको शाखा अधिकृत ठकुरीले बताउनुभयो ।