काठमाडौं, २५ कार्तिक :  सत्तारुढ नेपाल कम्युनिष्ट पार्टी (नेकपा) सचिवालयका शीर्ष पाँच नेताको छलफल पार्टी मुख्यालय धुम्बाराहीमा शुरु भएको छ ।

छलफलमा सचिवालयका बहुमत सदस्य सहभागी छन् । अध्यक्ष प्रचण्डसहित वरिष्ठ नेताद्वय माधवकुमार नेपाल, झलनाथ खनाल, उपाध्यक्ष वामदेव गौतम र प्रवक्ता नारायणकाजी श्रेष्ठ छलफलमा सहभागी छन् ।

छलफलअघि बालुवाटार पुगेर नेकपा अध्यक्ष एवम् प्रधानमन्त्री केपी ओलीसँग भेटेर कार्यकारी अध्यक्ष पुष्पकमल दाहाल ‘प्रचण्ड’ धुम्बाराही पुगेपछि छलफल शुरु भएको हो ।

बालुवाटारमा प्रधानमन्त्रीसँग भएको भेटको ब्रिफिङ प्रचण्डले बैठकमा गरिरहेका छन् । बालुवाटारमा प्रधानमन्त्री ओली र प्रचण्डबीचको छलफलमा बिहीबारसम्ममा सचिवालय बैठक बोलाउने विषयमा कुराकानी भएको छ ।

धुम्बाराहीमा जारी छलफललाई सचिवालय सदस्यको अनौपचारिक छलफल भनिएको छ । बैठकमा प्रधानमन्त्री ओलीसँगै सचिवालयका अन्य तीन सदस्य सहभागी छैनन् । सचिवालयका वहुमत सदस्यले वैठक माग गर्दै बुझाएको पत्रबारे ओलीले तीन दिनमा पनि ठोस निर्णय नदिएपछि कार्यकारी अध्यक्ष प्रचण्डले आजको वैठक बोलाएका हुन् ।