धुलिखेल, २२ कात्तिकः काभ्रेका पुष्प ब्यवसायीहरु तिहारका लागि माला उन्न ब्यस्त भएका छन् । फ्लोरिकल्चर एशोसियन अफ नेपाल काभ्रे शाखाका अध्यक्ष बिरेन्द्र बहादुर श्रेष्ठका अनुसार यो वर्ष काभ्रेबाट सयपत्री र गोदावरीको ६० हजार माला बजारमा पठाउने तयारी गरिएको छ ।

काभ्रेमा १० हजार माला खपत हुने र बाँकी ५० हजार माला भक्तपुर, काठमाण्डौ सहितका बजारहरुमा पठाउने तयारीमा ब्यवसायीहरु छुटेका छन् । काग तिहारबाट माला बजारमा ल्याउने तयारी रहेको फ्लोरिकल्चर एशोसियन अफ नेपाल काभ्रे शाखाका सचिव शम्भु तामाङले बताउनुभयो ।

प्रति माला न्यूनतम १२० देखि १६० सम्म बिक्री गर्ने ब्यवसायीहरुको योजना छ । यो वर्षको तिहारमा मात्रै करिब १२ लाखको माला बेचिने फ्लोरिकल्चर एशोसियन अफ नेपाल काभ्रे शाखाका कोषाध्यक्ष रुद्रबहादुर खड्काले जानकारी दिनुभयो । काभ्रेका पुष्प ब्यवसायीहरुले मंसिर महिनाभर मात्रै झण्डै १८ लाख बराबरको सयपत्री र गोदावरी फुल बिक्रीबाट आन्दानी लिने उहाँको भनाई छ । सयपत्री बाहेक कार्नेसन, जरवेराको माला माग भए प्रति माला ५ सयका दरमा उपलब्ध गराउने गरी ब्यवसायीहरुले तयारी गरेका छन् ।

काभ्रेमा ब्यवसायीक हिसाबले सयपत्री र गोदावरी अघिल्लो वर्षभन्दा कम लगाएपनि उत्पादन भने राम्रो रहेको किसानहरुले बताएका छन् । यो वर्ष काभ्रेमा ५० हजार फुल विरुवा सयपत्री र गोदावरी लगाईएको फ्लोरिकल्चर एशोसियन अफ नेपाल काभ्रे शाखाका उपाध्यक्ष भेष बहादुर दनुवारले बताउनुभयो । जिल्लाको पाँचखाल, धुलिखेल, नमोबुद्ध, बनेपा, पनौती नगरपालिका तथा रोशी गाउँपालिकामा ब्यवसायीक रुपमा सयपत्री र गोदावरी फुल खेती गरिएको छ ।

फ्लोरिकल्चर एशोसियन अफ नेपाल काभ्रे शाखामा आबद्ध भएका २६ जना मध्ये १६ जना किसानले व्यवसायीक रुपमा पुष्प खेती गरिरहेका छन् । फुलेका फुल खेर नजाओस भन्नका लागि ब्यवसायीहरुले स्टोर गर्ने कार्यलाई प्राथमिकता दिएका छन् ।