धुलिखेल, २२ धुलिखेल, पनौती नगरपालिकाको खोपासी प्राथमिक स्वास्थ्य केन्द्रमा पहिलो पटक भिडियो एक्सरे सेवा सुरु भएको छ । बागमती प्रदेश सरकारको सामाजिक विकास मन्त्रालय र नगरपालिकाको आर्थिक लगानीमा स्थापना गरिएको भिडियाे एक्सरे सेवाको आरम्भ आज नगरप्रमुख भिम प्रसाद न्यौपानेले गर्नुभएको हो ।

मन्त्रालयको १४ लाख र नगरपालिकाको ४ लाख लगानीमा एक्सरे सेवा सुरु गरिएको नगरपालिकाका स्वास्थ्य शाखा प्रमुख पुरुषोत्तम तिमिल्सिनाले जानकारी दिनुभयो । उहाँका अनुसार भिडियो एक्सरे सेवा सुरु भएसँगै पनौती, बेथानचोक र खानीखोला गाउँपालिकाका बिरामीलाई सहज हुनु भएको छ ।

नगरपालिकाले पनौती र कुशादेवीमा समेत भिडियो एक्सरे सेवा सञ्चालनमा ल्याउने योजना बनाएको छ । नगरपालिकाभित्र दुईवटा प्राथमिक स्वास्थ्य केन्द्र, ८ वटा स्वास्थ्य चौकी र दुई वटा शहरी स्वास्थ्य केन्द्र सहित १२ वटा स्वास्थ्य संस्था रहेका छन् । नगरपालिकाको स्वास्थ्य क्षेत्रलाई सुधार गर्ने योजना अन्तर्गत स्थापना गरिएको भिडियो एक्सरे मेसिनले नगरपालिकाभित्रका नागरिकलाई सहज हुने नगरप्रमु भिमप्रसाद न्यौपानेले जानकरी दिनुभयो ।