धुलिखेल, ३२ साउनः काभ्रेमा लगभग कोरोना भाइरसको संक्रमण निणन्त्रण बाहिर जाने खतरा बढेको छ । लकडाउन खुकुलो भएसँगै जिल्लामा संक्रमितको संख्या दिनदिनै बढिरहेको छ । तर नियमन कारी निकायले आफ्नो उपस्थिति जनाउन सकेको छैन । संक्रमितको संख्या थपिएसँगै सरकारी आइसोलेसन वेडको चरम अभाव हुन थालेको छ ।

स्रोत नखुलेका संक्रमित फेला पर्न थालेसँगै कोरोना भाइरस समुदायमा प्रवेश गरेको पुष्टि भइसकेको छ । तर जिल्लामा आइसोलेसन वेड थप गर्ने मामिलामा जिल्ला कोभिड संकट ब्यवस्थापन केन्द्र (डिसीसीएमसी) लगभग असफल जस्तै भएको छ । डिसीसीएमसीले पटक पटक जिल्लामा ओइसोलसन वेड थप्ने गर्ने निर्णय गरेका छ । तर कार्यान्वयनमा भने निकै फितलो देखिएको छ । दुई ठूलो अस्पताल रहेको जिल्लामा मुस्किलले ३९ वेड मात्रै आइसोलेसन छन् ।

जिल्लामा पछिल्लो २४ घण्टासम्म आइपुग्दा ७१ जनामा कोरोना भाइरस संक्रमण पुष्टि भइसकेको छ । एक जनाको मृत्यु भएको छ । संक्रमित मध्ये ३० जना उपचारपछि निको भएर घर फर्किएका छन् । ४१ जना आइसोलेसनमा छन् । तर जिल्लामा ३९ वेडको मात्रै सरकारी आइसोलेसन वेड छ । जिल्ला कमाण्ड पोष्टले दैनिक उपलब्ध गराउने विवरण अनुसार ४ जना होम आइसोलेसनमा बस्न थालेका छन् ।

हुन त सरकारले नै होम आइसोलेसनमा बस्न सक्ने गरी कार्यविधि पारित गरेर कार्यान्वयनमा ल्याएको छ । तर डिसीसीएमसीले आइसोलेसन थप गर्ने निर्णय पटक पटक गरिरहने र कार्यान्वयन नगर्दा जोखिमको सम्भवाना भने थप बढेको छ । हाल धुलिखेल अस्पतालमा १५ वेड, बनेपामा ५, पाँचखालमा ७, नमोबुद्धमा ६ र पनौतीमा ६ वटा आइसोलेसन बेड रहेको छ ।

धुलिखेल नगरपालिकाका स्वास्थ्य शाखा प्रमुख सन्दिप केसीले होम क्वारेन्टाइनमा बस्ने ब्यक्तिमा इमान्दारिताको आवश्यकता रहेको बताउनुभयो । ‘होम क्वारेन्टाइनमा बस्ने भनेको अन्तिम विकल्प हो, उहाँले भन्नुभयो ‘संक्रमितको संख्या बढ्दै जादाँ अस्पतालले थेक्न सक्दैन, त्यसैले होम क्वारेन्टाइनमा बस्दा परिवार र ब्यक्ति आफै सबैभन्दा बढी सचेत र सजग हुन आवश्यक छ ।’