धुलिखेल, २९ साउनः कोरोना संक्रमित मण्डनदेउपुर नगरपालिका वडा नम्बर १२ का वडाध्यक्ष साउन १८ गतेदेखि नगरपालिकाको कुनै पनि बैठक र सभाहरुमा सहभागि नभएको पाइएको छ । संक्रमित वडाध्यक्षले १८ गतेदेखि नगरपालिकाले आयोजना गरेको कुनै पनि कार्यक्रमहरुमा सहभागि नभएको जानकारी गराएको नगरपालिकाको कोभिड संयोजक दिपक कुमार घिमिरेले जानकारी दिए ।

नगरपालिकाको बैठकमा सहभागि नभएपनि संक्रमित वडाध्यक्षले वडाको कार्यक्रमहरुमा भने सहभागिता जनाएको बताइएको छ । वडाध्यक्षलाई आइसोलेसनमा राख्न धुलिखेल अस्पताल ल्याइएको छ । टेलिफोनमा कुरा गर्दै संक्रमित वडाध्यक्षले आफु स्वास्थ्य रहेको बताउनुभयो । ‘मेरो स्वास्थ्यमा कुनै पनि समस्या छैन्, वडाध्यक्षले भन्नुभयो ‘तर स्वास्थ्यका नियम पालना गर्नुपर्छ ।’

संक्रमित वडाध्यक्षको दोलालघाट पसल छ । उहाँको पसलमा आवातजावात भइरहेको थियो । पसलबाट अन्य ब्यक्तिमा समेत कोरोना संक्रमण फैलन सक्ने भन्दै भुम्लु गाउँपालिकाले सचेत रहन सबैलाई आग्रह गरेको छ । निमित्त प्रमुख प्रशासकिय अधिकृत रुपक अधिकारीले एक सूचना जारी गर्दै दोलालघाट बजार क्षेत्रका होटल, पसल सञ्चालन नगर्न, अनावश्यक हिडडुल नगर्न र अत्यावश्यक बाहेक घर बाहिर समेत ननिस्कन आग्रह गर्नुभएको छ ।

दोलालघाट बजार भुम्लु गाउँपालिकाको वडा नम्बर ८ र १० नम्बर क्षेत्रभित्र पर्छ । काभ्रे जिल्लामा आज संक्रमित १० जना मध्ये ६ जना प्रहरी अस्पताल काठमाण्डौ र बाँकी ४ जनालाई धुलिखेल अस्पतालको आइसोलेसनमा राख्ने तयारी भइरहेको स्वास्थ्य कार्यालय काभ्रेका डाक्टर नरेन्द्र कुमार झाले जानकारी दिनुभयो ।