धुलिखेल, १६ साउनः जिल्ला प्रहरी कार्यालय काभ्रेले धुलिखेल नगरपालिका वडा नम्बर ११ आरुबोट कैदीटोल बस्ने बर्ष ५४ को कामी सीं तामाङको हत्या गरेको आरोपमा २ युवालाई पक्राउ गरेको छ । पक्राउ पर्नेहरुमा २१ बर्षीय सन्जिव मैनाली र २३ बर्षीय रुपेन्द्रमान लामा रहेको काभ्रेका प्रमुख एसपी रविकुमार पौडेलले जानकारी दिनुभयो ।

कामी सिंको हिजो बिहान पाँचखाल नगरपालिका वडा नम्बर १० बेला स्थित बीपी राजमार्गको सहायक सडकमा लास फेला परेको थियो । रुपेन्द्रमान लामा वडा नम्बर ११ बाटै पक्राउ गरेका हुन् भने मैनालीलाई ललितपुर जिल्ला महालक्ष्मी नगरपालिका वडा नम्बर ०४ ढुङ्गेसाँगुबाट पक्राउ गरिएको जिल्ला प्रहरी कार्यालय काभ्रेले जनाएको छ ।

तामाङको शव लिएर मलामी गएको गाडी नमोबुद्धमा दुर्घटना भएको थियो । दुर्घटनामा ७ जना घाइते भएका छन् । घाइते मध्ये २ जनाकाे अवस्था गम्भीरहेकाे प्रहरीले जनाएकाे छ । घाइते सबैकाे धुलिखेल अस्पतालमा उपचार भइरहेकाे छ ।