धुलिखेल, १२ साउनः राजधानी प्रवेश गर्ने पूर्वी नाका काभ्रेको साँगामा कोरोना परीक्षणका लागि स्वाब संकलन सुरु भएको छ । स्वास्थ्य तथा जनसंख्या मन्त्रालयले नाकामै स्वाब संकलन गर्न थालेको हो ।

सवारी साधन मार्फत राजधानी प्रवेश गर्ने नागरिकको स्वाब सकंलन गर्ने गरिएको छ । काठमाण्डोबाटै स्वास्थ्यकर्मीको टोली आएर स्वाब संकलन गरिरहेको बनेपा नगरपालिकाका स्वास्थ्य संयोजक सत्यश्वर मकै श्रेष्ठले जानकारी दिनुभयो । नाकामा स्वाब संकलनका लागि समन्वयको काम भने नगरपालिकाको स्वास्थ्य शाखाले गरेको छ ।

स्वास्थ्य शाखाले रेडक्रससँगको सहकार्यमा दुई वटा टेण्ड राखिदिएको छ । त्यस्तै स्वास्थ्यकर्मी समेत खटाएको संयोजक श्रेष्ठले बताउनुभयो । नाकामा खास गरी कोरोना बढी प्रभावित जिल्लाबाट राजधानी प्रवेश गर्न खोज्ने यात्रुहरुको स्वाब संकलन हुने गरेको छ । लकडाउन खुकुलो भएसँगै बीपी राजमार्ग भएर तराई र पूर्वी पहाडका जिल्लाबाट राजधानी प्रवेश गर्ने सवारी साधनको संख्या ह्वात्तै बढेको छ ।

केन्द्र सरकारले साँगा सहित नागढुंगा र फर्पिङ नाकामा स्वाब संकलन गरिरहेको छ । यी तीन वाटै नाकाबाट १० हजार यात्रुको स्वाब परीक्षणका लागि संकलन गर्ने बताइएको छ ।