धुलिखेल, ८ साउन काभ्रेको पनौति नगरपालिका वडा नम्बर ४ को विभिन्न बस्तीहरुमा पिउने पानीको समस्या भएको छ । वर्षका कारण पानीको मुहानमा बाढी पसेकाले पिउने पानी नआएको वडा अध्यक्ष बुद्ध सिंह थापाले जानकारी दिनुभयो ।

उहाँका अनुसार ज्याचिटी टोल, टौखाल, संखेल लगायतका ठाँउमा बिगत चार दिन देखि पानी आएको छैन । पिउने पानी नआए पछि सथानीयले ईनारको पानी उमालेर खान थालेका छन् ।

निरन्तर बर्षा भइरहेकाले बनको बिचमा भएको मुहान मर्मत सम्भार गर्न जान समस्या भएको अध्यक्ष थापाको भनाई छ । वडाका करिब ८२ घर परिवारमा पिउने पानी नआएकाले समस्या भएको हो ।

पनौतीकै वडा नम्बर ७ मा पनि खानेपानीको समस्या देखिन थालेको छ । पिउने पानी आउने मुहानबाट धमीलो पानी आउन थालेको वडा अध्यक्ष रामचन्द्र नाश्नानीले जानकारी दिनुभयो । धमीलो पानी आएपछि स्थानीयलाई पिउने पानीको समस्या भएको हो ।