धुलिखेल, ३ साउनः काभ्रेमा कोरोना भाइरसको आशंकामा क्वारेन्टाइन बस्नेको संख्या निकै कम हुदैँ गएको छ । जिल्ला कमाण्ड पोष्टले उपलब्ध गराएको वितरण अनुसार आज १ सय ३४ जना जिल्लाका विभिन्न क्वारेन्टाइनमा बसिरहेका छन् । त्यसमा १ सय ९ जना पुरुष र २५ जना महिला रहेका छन् ।

सबैभन्दा धेरै बनेपाको क्वारेन्टाइनमा २० जना रहेका छन् । पनौतीमा १९, रोशीमा १८ जना र मण्डनदेउपुरमा १७ जना रहेका छन् । तेमालमा १७ जना, नमोबुद्धमा १३, भुम्लुमा ९ जना, धुलिखेल र पाँचखालमा ८/८ जना र बेथानचोकमा ५ जना मात्रै रहेका छन् ।

खानीखोला, महाभारत र चौरीदेउरी गाउँपालिकाका सम्भावित कोरोना संक्रमणलाई धुलिखेल क्वारेन्टाइनमै राखिने भएकाले त्यहाँको क्वारेन्टाइन भने खाली छन् । जिल्लामा क्वारेन्टाइन बेड संख्या ८ सय ५१ रहेको छ । जेठ २३ गतेदेखि हालसम्म भारत बाहेकका मुलुकका २ सय ५६ जना काभ्रेली आफ्नो जिल्ला भित्रिएका छन् ।