धुलिखेल, ३१ असारः धुलिखेल नगरपालिकाभित्रका स्वास्थ्यकर्मीको एउटा समूहले जोखिम भत्ता वितरणमा पारदर्शि नभएको आरोप लगाएका छन् । नगरकार्यपालिका बैठकले गरेको निर्णय विपरित विभेदकारी ढंगबाट भत्ता वितरण गरेको भन्दै उनीहरुले आज नगरपालिकामै पुगेर आपत्ति जनाएका हुन् ।

कार्यपालिका बैठकले कोरोना भाइरस महाभारी रोगको रोकथामका लागि नगरपालिकाको विभिन्न सेवा केन्द्र, क्वारेन्टीन तथा फिल्डमा खटिने स्वास्थ्यकर्मी र नगरपालिकाबाट तोकिएका कर्मचारीहरुलाई जोखिम भत्ता दिने निर्णय भएको थियो । बैठकले प्रत्यक्ष संलग्न ल्याब कर्मचारलाई तलब स्केलको ७५ प्रतिशत भत्ता दिने निर्णय गरेको थियो ।

त्यस्तै आठौ तह र सो भन्दा माथिका कर्मचारीलाई मासिक २० हजार, अधिकृतस्तर छैठौ र सातौँस्तरका कर्मचारीलाई मासिक १८ हजार, पाँचौस्तरका कर्मचारीलाई मासिक १५ हजार, चौथौस्तरका कर्मचारीलाई मासिक १३ हजार र श्रेणीबिहीन सरसफाईकर्मीलाई ८ हजार रुपैयाँ भत्ता उपलब्ध गराउने निर्णय गरेको थियो ।

पीडित स्वास्थ्यकर्मीहरुको तर्फबाट नगरपालिकाका प्रमुख प्रशासकीय अधिकृत तारानाथ लुईटेललाई दिइएको निवेदनमा भत्ता वितरणलाई पारदर्शी बनाई स्वास्थ्यकर्मीहरुको सेवा सुविधामा पुनरावलोकन गर्न माग गरिएको छ । उनीहरुले स्वास्थ्य संस्थाका साथै क्वारेन्टाइनमा आफ्नो स्वास्थ्यलाई जोखिममा राखी कोरोना भाइरससँगको लडाईमा अग्रपंत्तिमा रहेर ड्युटीमा खटिएकासमान तहका कर्मचारीहरुमा समान भत्ता नपाएको गुनासो गरेका छन् ।

२०७६ चैतको २२ दिन र बैशाख-जेठ महिनाको भत्तामा विभेद भएको स्वास्थ्यकर्मीहरुको गुनासो छ । यसरी भत्ता पाउनेमा ६६ जना कर्मचारी छन् । असन्तुष्टि जनाउँदै नगरपालिकामा १४ जना कर्मचारी पुगेका थिए ।