होमेन्द्र राना, घर्तीछाप/३० असारः काभ्रेको अति दुर्गम महाभातर गाउँपालिकाका विभिन्न वडामा अज्ञात रोगले बाख्रा मर्न थालेपछि स्थानीय चिन्तित बनेका छन् । पालिकाको घर्तीछाप, बनखु, फोक्सिङटार लगायतका क्षेत्रमा बाख्रा मर्न थालेका हुन् ।

बाख्रामा पेट सुन्निने, पिसाब रोकिने र सुख्खा खोकी लाग्ने लक्षण देखिने गरेको घर्तीछापबाट पत्रकार होमेन्द्र रानाले जानकारी दिनुभयो । एउटै किसानको ४ वटासम्म बाख्रा मरिसकेका छन् । एक साता भन्दाअघि देखि बाख्रामा अनौठो लक्षण देखिन थालेको स्थानीयहरुले बताएका छन् ।

घर्ती छापका अञ्जु मगरको ४ वटा बाख्रा र बलबहादुर रमौलि मगरका २ वटा खसि मरेका छन् । उपचारका लागि अहिलेसम्म कुनै पनि वास्ता नभएको स्थानीयहरुले गुनासो गरेका छन् । घर्तीछापको डबली, चाउडिक, गाताबेशी, गैरिगाउँ लगायतका गाउँमा सबैभन्दा धेरै बाख्रा मरेका छन् ।