धुलिखेल, २४ असारः काभ्रेको भुम्लुमा गाउँपालिका सञ्चालनमा ल्याएको क्वारेन्टाइनमा बसेकाहरुले आफ्नो पिसिआर गर्नुपर्ने माग गरेका छन् । पालिकाले अहिले सम्म क्वारेन्टाइनमा बसेकाहरुको आरडिटी परीक्षणलाई मात्रै आधार मान्दै आएको छ ।

आरडिटीमा पोजेटिभ देखिए पिसिआरका लागि स्वाब संकलन गरी पठाउने र नेगेटिभ आए १४ दिन राखेर घर पठाउने गरेको क्वारेन्टाइनमा बस्नेहरु बताएका छन् । क्वारेन्टाइन बस्नेहरु सबैले पिसिआर गर्न माग गरेपनि स्वास्थ्य कार्यलय काभ्रेबाट स्वीकृती नपाएको पालिकाका स्वास्थ्य शाखा संयोजक शुदर्शन भट्राइले बताउनुभयो ।

पालिका भित्रकाको क्वारेन्टाइनमा आज सम्म ११ जना रहेकोमा आज ५ जना डिस्चार्ज भएर घर फर्किका छन् । यसअघि पनि पालिकामा ४ जना डिस्चार्ज भएर घर फर्किको पालिकाका स्वास्थ्य शाखा संयोजक भट्राइले बताउनुभयो ।

धुलिखेल क्वारेन्टाइनमा बस्नेको भने सबैको पिसिआर परीक्षण हुने गरेको छ । सरकारको स्वास्थ्य नितीले क्वारेन्टाइन बस्ने सबैको पिसिआर परीक्षण गर्नुपर्ने नभनेता पनि क्वारेन्टाइन बसिकेपछि घरपरिवार र समाज ढुक्क हुन भनेर सबैको पिसिआर गर्ने गरेको नगरपालिकाका स्वास्थ्य संयोजक सन्दिप केसीले बताए । धुलिखेल नगरपालिकाले आफ्नै खर्चमा भीटिएम गरि गरी पिसिआर परीक्षणमा सहयोग गरिरहेको छ ।

स्वास्थ्य निर्देशिका अनुसार क्वारेन्टाइन बसेको कम्तिमा पाँच दिन पुगेपछि मात्रै आरडिटी परीक्षण हुन्छ । पछिल्लो निर्देशिकामा अनुसार ५ देखि १० दिनकोबीचमा परीक्षण गराउने उल्लेख रहेको स्वास्थ्य संयोजक केसीले बताए ।

धुलिखेल नगरपालिकाको क्वारेन्टाइनमा धुलिखेल, खानीखोला, महाभारत र चौरीदेउराली गाउँपालिका भारत बाहेक तेस्रो मुलुकबाट आएकाहरु बस्ने गरेका छन् । धुलिखेलमा बुधबार ३१ जना पुरुष र ३ जना महिला रहेका छन् । धुलिखेलमा क्वारेन्टाइन वेड संख्या १५२ छ ।