धुलिखेल, २१ असारः काभ्रेमा एकैदिन चार जना काेराेना संक्रमित थपिएका छन् । संक्रमित हुनेमा पाँचखाल नगरपालिकाका दुईजना, महाभारत गाउँपालिका घर भई हाल धुलिखेलस्थित सञ्जिवनी क्वारेन्टाईनमा बस्दै आएको एक जना र बनेपा नगरपालिका नगरपालिकाका एक रहेका छन् ।

संक्रमित हुनेमा दुबईबाट असार ९ गते पाँचखालको क्वारेन्टाइनमा आएका पाँचखाल नगरपालिका वडा नम्बर १ का २६ बर्षीय पुरुष र साउदीबाट असार १३ गते आएका ३१ बर्षीय पुरुष छन् ।

त्यस्तै बुडोल स्थित नेपाल रेडक्रस सोसाइटीको तालिम केन्द्र क्वारेन्टाइनमा बस्ने साउदीबाट आएका बनेपा नगरपालिका वडा नम्बर १२ का २८ बर्षीय पुरुष र धुलिखेल स्थित सञ्जीवनी माविको क्वारेन्टाइनमा बस्ने दुबई बाट आएका महाभारत गाउँपालिका वडा नम्बर २ का २२ बर्षीय पुरुष रहेकाे स्वास्थ्य कार्यालय काभ्रेका प्रमुख डाक्टर नरेन्द्र कुमार झाले जानकारी दिए ।

यो सँगै जिल्लामा कोरोना संक्रमितको संख्या १३ पुगेको छ । त्यस मध्ये ७ जना भने उपचारपछि निको भएर घर फर्किसकेका छन् । जिल्लाको १३ वटा स्थानीय तह मध्ये पाँचखाल नगरपालिका, पनौती नगरपालिका, रोशी, बेथानचोक र महाभारत गाउँपालिकामा संक्रमित देखिएको छ ।