धुलिखेल, २१ असारः सिन्धुपाल्चोक जिल्लाको मेलम्ची बजारको निगरानी राख्न सीसी क्यामेरा जडान गरिएको छ । बजार क्षेत्रमा शान्ती सुरक्षामा कुनै खलल आइहाले दोषि पत्ता लगाउन सजिलो हो भनेर सीसी क्यामेरा जडान गरिएको नगरपालिकाले जनाएको छ ।

सीसी क्यामेरा आज जडान गरिएको हो । इलाका प्रहरी कार्यालय परिसरमा २ वटा र बाँकी ११ वटा मेलम्ची खानेपानी आयोजनाको कार्यालय देखि बजार अस्पताल क्षेत्रमा जडान गरिएको मेलम्ची नगर पालिकाका प्रमुख डम्बर अर्यालले बताउनुभयो ।

सीसी क्यामेरा जडानका लागि मेलम्ची नगरपालिकाले चालु आर्थिक वर्षका लागि १० लाख रुपैयाँ विनियोजन गरेको थियो । त्यस्तै उपभोक्ता समितिबाट संकलन गरिएको साठ्ठी हजार रुपैयाबाट क्यामेरा खरिद गरि जडान गरिएको उपभोक्ता समितिका संयोजक गुणनिधि दुलालले जानकारी दिनुभयो ।

सीसी क्यामेराको कन्ट्रोल इलाका प्रहरी कार्यालयले गर्ने छ । क्यामेरा जडानपछि सुरक्षामा थप सजिलो हुने इलाका प्रहरी कार्यालयका प्रमुख फल बहादुर तामाङले बताउनुभयो ।