धुलिखेल, २१ असारः पाँचखाल नगरपालिकाले आगामी आर्थिक वर्षबाट ७० वर्षमाथिका बृद्धबृद्धाहरुको निःशुल्क स्वास्थ्य जाँच गरिदिने भएको छ । सातौँ नगरसभामा पेस भएको नीति तथा कार्यक्रममा नगरप्रमुख महेश खरेलले ७० वर्षभन्दा माथिका बृद्धबृद्धाको निःशुल्क स्वास्थ्य जाँच गर्ने ब्यवस्थालाई अनिवार्य गरिने उल्लेख गर्नुभएको हो ।

कडा रोग लागेका ब्यक्तिहरुलाई वडाले सिफासिरस गरे उपचार खर्चको समेत ब्यवस्था गर्ने नगरपालिकाले जनाएको छ । नगरपालिकाले वडा नम्बर ६ मा रहेको प्राथमिक स्वास्थ्य केन्द्रलाई अस्पतालको रुपमा विकास गरेर एक्स रे सञ्चालन गर्ने बताएको छ ।

त्यस्तै बालुवा र साठीघर स्वास्थ्य चौकीबाट ल्याब सेवा नियमित सञ्चालन गर्ने ब्यवस्था नीति तथा कार्यक्रममा भनिएको छ । नगरपालिकाले शहरी स्वास्थ्य ईकाइ नभएका वडाहरुमा शहरी स्वास्थ्य इकाइको ब्यवस्था गरिने बताएको छ ।

महिला स्वास्थ्य स्वयंसेविकाहरुलाई उपलब्ध गराउँदै आएको यातायात तथा खाजा खर्च बापतको रुकममा समय सापेक्ष बृद्धि गर्ने नगरप्रमुख खरेलले बताउनुभयो । नगरभित्र विशेषज्ञ सहितको घुम्ती शिविर सेवालाई निरन्तरता दिइने भएको छ । नगरपालिकाभित्र स्वास्थ्य बिमा कार्यक्रम लागु गर्न विशेष पहल गर्ने मेयर खरेलले बताउनुभयो ।

नीति तथा कार्यक्रममा मानसिक रोगको विशेषज्ञ क्लिनिक सञ्चालन गर्ने र मोतियाविन्दुको स्कृनिङ्ग तथा अप्रेशन गर्ने उल्लेख गरिएको छ ।