धुलिखेल, २० असारः मण्डनदेउपुर नगरपालिकाले नगरपालिकाभित्र वर्षमा तीन बाली लाग्ने फाँटमा ईंटा उद्योग स्थापना गर्न नदिने भएको छ । नगरपालिकाको ७ औँ नगरसभाले आगामी वर्ष पनि फाँटमा ईटा उद्योग सञ्चालन गर्न नदिने कार्यक्रमलाई निरन्तरता दिएको हो ।

आँशिखोला, कुन्ताफाँट, ढाइटारफाँट, चाखोलाफाँट, ढाईटार, सिपाघाट, जोगीटार, ज्वानेटार, हल्देटार, कामीटार, आँपघारी, रायोबारी, राम्चेवेशी, गैह्रीखेत, डुँडे, बोक्से, माझीटार, मजुवा भिमटार, साण्डी, ठुल्डी र जैसिथोक क्षेत्रमा ईट्टा भट्ट सञ्चालन गर्न पाइने छैन । बाली उत्पादन हुने मुख्य ठाउँमा इट्टा भट्ट सञ्चालन गर्दा बालीमा प्रत्यक्ष असर पर्ने भएकाले यस्तो नीति बनाइएको नगरप्रमुख टोक बहादुर वाइबाले बताउनुभयो ।

यसैबीच नगरपालिकाले आगामी आर्थिक वर्षमा नकुहिने फोहोर ब्यवस्थापन गर्न ल्याण्डफिल साइटको भौतिक पूर्वाधारको निमार्ण गर्ने भएको छ । कुहिने फोहोर भने आफ्नै ठाउँमा ब्यवस्थापन गर्न नगरपालिकाभर सचेतना मुलक कार्यक्रम सञ्चालन गरिनेछ ।