धुलिखेल, १३ असारः काभ्रेको तेमाल गाउँपालिकाले सातौँ गाउँसभा मार्फत आगामी आर्थिक वर्षको नीति, कार्यक्रम तथा बजेट पारित गरेको छ । शुक्रबार पालिकाको केन्द्र पोखारी नारायणस्थानमा बसेको गाउँसभाले आगामी आर्थिक वर्षको ४८ करोड ८८ लाख ८५ हजार ७ सय ७२ रुपैँयाको बजेट सर्वसम्मत पारित गरेको हो ।

साताैँ गाउँसभासम्म आइपुग्दा गाउँपालिकाले थुप्रै राम्रो कामहरु गरेको छ । गाउँसभामा बजेट सार्वजनिक गर्दै उपप्रमुख दुर्गा माया तामाङले तेमाल समृद्धिका केहि नारा पनि सार्वजनिक गरिन । गाउँपालिकाले आगामी आर्थिक वर्षका लागि “रोकौँ महामारी, उठाऔँ पूर्वाधार, बढाऔँ उत्पादन, बनाँै स्वरोजगार” भन्ने नारालाई मुख्य बनाएको छ ।

उपप्रमुख तामाङले सबल तथा दीगो आर्थिक विकासका लागि “तेमाल गाउँपालिकाको पूर्वाधारहरुको विकास, यसले तेमालबासीको जीवनस्तरमा ल्याउँछ सकारात्मक सुधारको निकास” भन्ने नारालाई आदर्श वाक्यको रुपमा गाउँपालिकाले लिने बताइन् । त्यस्तै “टोल टोलमा सडक सञ्जालको विस्तार, तेमालबासीको जीवनस्तर सुधारको मुख्य आधार” भन्ने वाक्यलाई मुल नाराको रुपमा मनन गरेर सडक स्तरोन्नतीलाई विशेष प्राथमिकतामा राखेको बताइन् ।

“कृषिको आधुनिक ब्यवसायिकरण, जीवन निर्वाहका लागि लिनु पर्दैन अरुको शरण” भन्ने भनाईलाई मूर्त रुप दिदैँ खाद्यान्न तथा पशुजन्य पदार्थ उत्पादनमा तेमाललाई आत्मनिर्भर गरी स्थानीय बजारको निर्माणमा गरिने उल्लेखछ । धार्मिक पर्यटनको हिसाबले निकै महत्वपर्ण पालिकाभित्र पर्ने तेमाल गाउँपालिकाले अर्को पनि नारा सारेको छ, “तेमालको धन, गतिशिल पर्यटन” यो नारालाई साकार पार्न तेमाललाई पर्यटकहरुको आकर्षणको केन्द्र बनाउने र प्रचारप्रसारलाई तीब्रता दिइने भनिएको छ ।

तेमाल बहुमुल्य बुद्धचित्त उत्पादनका हिसाबले विश्वकै उत्कृष्ट ठाउँभित्र पर्छ । त्यसलाई थप मूर्तरुप दिन उपाध्यक्ष दुर्गामाया तामाङ “तेमालको सम्बृद्धि, बोधि चित्त मालाको उत्पादनमा बृद्धि” भन्ने नारालाई आदर्श वाक्यको रुपमा लिने बताइन् । बोधिचित्त माला उत्पादनमा आधुनिकीकरण गरी बजारको उचित र सहज ब्यवस्थापनमा गाउँपालिकाले उचित भूमिका निर्वाह गर्ने बताइएको छ ।

तेमाल सुख्खाग्रस्त क्षेत्रको रुपमा परिचित छ । रैथाने पानीमा मुलहरु सुकेका छन् । पालिका प्रमुख सलाम सिंह तामाङले गाउँसभामा प्रस्तुत गरेको नीति तथा कार्यक्रममा टोल बस्तीमा रहेका स साना पोखरीहरुलाई अभियानकै रुपमा समुदायको अगुवाईमा संरक्षण गर्ने कार्यलाई यो वर्ष पनि निरन्तरता दिएका छन् । यसलाई थप प्रष्ट्याउन उपप्रमुख दुर्गामाया तामाङले “सबैले पाउन स्वच्छ पिउने पानी” भन्ने उक्तिलाई तेमालबासीलाई स्वच्छ पिउने पानीको प्रवन्ध मिलाउने रणनीति अबलम्बन गरिने बताइन् ।