धुलिखेल, ९ असारः काभ्रेको मण्डनदेउपुर नगरपालिकामा अस्पताल निर्माणको काम धमाधम सुरु भएको छ । अस्पताल निर्माणका लागि बागमती प्रदेश सरकारले ७ करोड रुपैयाँ विनियोजन गरेको छ । अस्पताल नगरपालिकाको वडा नम्बर ७ नौबिसेमा निर्माण हुनेछ ।

अस्पतालको भोली बागमती प्रदेशका सामाजिक विकास मन्त्री युवराज दुलालले शिलान्यास गर्ने नगरपालिकाले जनाएको छ । एक जना डाक्टरको नेतृत्वमा नर्सिङ, प्यारामेडिक र प्रयोगशाला सञ्चालन हुनेछ । अस्पताल निर्माण भएपछि आकस्मिक सेवा समेत सुरु हुनेछ ।

पहिलो चरणमा ५ वेड तयार हुनेछ भने १५ बेडसम्म विस्तार गरिनेछ । प्रसुती सेवा सहितको ओपिडी पनि सञ्चालन गर्ने नगरपालिकाले जनाएको छ । अस्पताल निर्माणका लागि अघिल्लो वर्ष पनि प्रदेश सरकारले २ करोड रुपैयाँ विनियोजन गरेको थियो ।

अस्पताल निर्माणका लागि १२ करोड ४५ लाख लाग्ने विस्तृत परियोजना प्रतिवेदन (डिपिआर) मा उल्लेख गरिएको छ ।