धुलिखेल ८ असारः धुलिखेल स्थित काठमाण्डौ विश्व विद्यालयको स्कुल आफ इन्जिनियरिङ विभागले अनलाईन पठनपाठन सुरु गरेको छ । विद्यार्थीहरुको माग र आवश्यकताका आधारमा अनलाइन पठनपाठन सुरु गरिएको हो ।

लकडाउन लम्बिदैँ जाँदा विद्यार्थीहरुको पठनपाठन थप नबिग्रियोस भन्नका लागि अनलाइन कक्षा सुरु गरिएको स्कुल आफ इन्जिनियरिङ विभागका एशोसिएट डिन प्राध्यापक डाक्टर हरि न्यौपानेले जानकारी दिए । दुईहजार भन्दा बढी विद्यार्थी अनलाइन कक्षामा सामेल भइरहेका छन् । स्कुल आफ इन्जिनियरिङ विभागमा ३५ सयको हाराहारिमा विद्यार्थी छन् ।

विद्यार्थीहरुलाई विभागले इन्टरनेटका लागि डाटा प्याक समेत विशेष छुटमा उपलब्ध गराएको छ । देशका विभिन्न दुर्गम भेगका विद्यार्थीलाई समेत समेट्ने उद्देश्यले डाटा प्याकको ब्यवस्था गरिएको हो ।

विद्यार्थीहरुको समयलाई ध्यान दिएर कक्षा सञ्चालन गर्ने गरिएको छ । ‘हामीले विद्यार्थीहरुको समय हेरेर पठनपाठन गरिरहेका छौँ, प्राध्यापक डाक्टर न्यौपानेले भने ‘इन्टनेटका लागि डाटा प्याक दिइरहेका छौँ, आवश्यकता अनुसार यसलाई बढाएर पठनपाठनलाई सहज बनाउने गरी अघि बढीरहेका छाैँ ।’