धुलिखेल, ४ असारः धुलिखेल नगरपालिकाको वडा नम्बर ८ को हवेली डाँडासम्म सडक ढलान हुने भएको छ । चालु आर्थिक वर्षभित्रै सकाउने गरी नगरप्रमुख अशोक ब्याञ्जुले ढलानको शिलान्यास गरेका हुन् ।

नगरपालिकाको २६ लाख र उपभोक्ताको १६ लाख गरी कुल ४० लाखमा सडक ढलान हुने नगरपालिकाका इन्जिनियर हरेराम हुमागाईले जानकारी दिए । २ सय ६० मिटर सडकमा पक्की ढलान हुनेछ । ६०÷४० को अवधारण अन्तर्गत सडक ढलान हुन लागेको हो ।

शिलान्यास कार्यक्रममा बोल्दै नगरप्रमुख ब्याञ्जुले नगरका हरेक वडाका सडक बाह्रै महिना सवारी साधन चल्ने बनाउने नगरपालिकाको योजना रहेको बताए । उनले सडक पूर्वाधार राम्रो भए पर्यटक आउजाउ देखि स्थानीय स्तरमा उत्पादन हुने कृषि उपज सहज रुपमा बजारसम्म लैजान सजिलो हुने बताए ।

कार्यक्रममा उपप्रमुख बिमला शर्मा, वडा नम्बर ८ का वडाध्यक्ष निरञ्जन जंगम लगायतका जनप्रतिनिधि र उपभोक्ताहरु सहभागि भएका थिए ।