धुलिखेल, ३१ जेठः धुलिखेल नगरपालिकाको वडा नम्बर १ देवीटारमा खानेपानी आयोजना निर्माणको अन्तिम चरणमा पुगेको छ । वडा नम्बर १ को देवीटारमा १० लाख आर्थिक सहयोगमा सञ्चालन भएको योजना मुहान देखि ट्याङकी निर्माणसम्मको काम सकिएको छ ।

त्यस्तै फोक्सेभिर खानेपानी आयोजनाको ७० प्रतिशत काम सकिएको वडाध्यक्ष रमेश प्रसाद घोरासइनेले जानकारी दिनुभयो । यो खानेपानी आयोजनाको काम पनि चालु आर्थिक वर्षभित्र सकिने छ । नगरपालिकाको आर्थिक सहयोगमा भइरहेको कामको नगरप्रमुख अशोक ब्याञ्जुले आज अवलोकन समेत गरेको वडाध्यक्ष घोरासइनेले बताउनुभयो ।

दुई योजना अन्तर्गत वडाका ४ सय घरधुरी लाभान्वित हुनेछन् । धारा जडानको काम भने आगामी आर्थिक वर्षबाट सुरु हुनेछ । एक घर, एक धारा कार्यक्रम अन्तर्गत खानेपानी आयोजना सुरु भएको र काम सोचेअनुसार नै भइरहेको नगरप्रमुख ब्याञ्जुले बताउनुभयो ।