धुलिखेल, ३१ जेठः काभ्रेको महाभारत गाउँपालिकाका ७ जनामा कोरोना भाइरस नभएको पाइएको छ । पालिकाको चारकिल्ला स्थित क्वारेन्टाइनमा बसेका ७ जनाको स्वाब संकलन गरी धुलिखेल अस्पतालको कोरोना प्रयोगशालामा परीक्षण गरिएको थियो । परीक्षणमा सातै जनामा कोरोना भारइरस नरहेको पाइएको पालिकाका स्वास्थ्य संयोजक हरिसिंह विष्टले जानकारी दिए ।

इन्डियाको बिहारबाट आएका १९ दिनदेखि क्वारेन्टाइनमा छन् । उनीहरुको जेठ २८ गते धुलिखेल अस्प्तालमा स्वाब ल्याइएको थियो । ‘धुलिखेल अस्पतालबाट सातै जानको रिपोर्ट नेगेटिभ भन्ने आएको जानकारी पाएको छु, स्वास्थ्य संयोजक विष्टले भने ‘उहाँहरु सबै भारतबाट आउनुभएको हो ।’

क्वारेन्टाइनमा बस्ने सबै पुरुष छन् । १५ देखि ५९ वर्ष उमेरका पुरुष रहेको स्वास्थ्य संयोजक विष्टले बताए । उनीहरुलाई २१ दिन क्वारेन्टाइनमा राखेर घर पठाइनेछ ।

महाभारतको अन्य थप दुई जनापनि क्वारेन्टाइनमा रहेका छन् । दुई जना २२ गतेदेखि वडा नम्बर ७ स्थित ज्योती आधारभूत विद्यालयको क्वारेन्टाइनमा छन् । पालिकामा ४६ बेड क्वारेन्टाइन तयारी अवस्थामा राखिएको छ ।