मालिक!
म अछुत हुँ
म देखि हजुर अलि पर बस्नुहोस्
अह मलाई छुदै नछुनुहोस्
किन कि मैले छोएपछि हजुर पनि अछुत हुनुहुनेछ ।

यो माटोलाई पनि छुदै नछुनुहोस्
हेर्नुस् त यो माटोमा
मेरी आमाको पैतालाका डोबहरु छन्
अब यो माटो पनि अछुत भैसकेको छ
बिन्ति छ यस्लाई पनि छुदै नछुनुहोस् ।

मलाई नै छोएर यो हावा हजुर तिरै आइरहेको छ
यो हावा देखि धेरै पर बस्नुहोस्
जहाँ मैले छोएको हावाले हजुरलाई छुन नसकोस्
र भेट्न नसकोस् ।

यो खोलाको पानी कसैले नछुनु
खोला पुरै अछुत भैसकेको छ
यहि पानी भित्र बगेको छ मेरो आँसु
यहि पानीमा गन्ध आउनेछ मेरै रगत
हरेक पानीको थोपाले मलाई छोएको छ
ढुंगाको एक एक कणले मलाई छोएको छ
यहि खोलामा मेरो चिहान छ
यहि पानी भित्र मेरो अन्तिम सास छ
मालिक !
कति वर्ष पछि पबित्र हुनेछु म ?
कति हजार वर्ष पछि ?
प्रयत्ना वाइबा-रौतहट