धुलिखेल, २७ जेठ : काभ्रेको पाँचखाल नगरपालिकाका किसानहरुले अमेरिकन पौजी किरा नियन्त्रणका लागि जनप्रतिनिधिले कुनै वास्ता नगरेको गुनासो गरेका छन् । पाँचखाल नगरपालिकाको वडा नम्बर १०, ११ र १२ नम्बर वडामा फौजी किराले मकैबाली सखाप पारिसकेको छ । तर नियन्त्रणमा वडा कार्यालयहरुले कुनै पहल नगरेको किसानहरुले गुनासो गरेका छन् ।

वडा नम्बर १० का गणेश अधिकारीले जनप्रतिनिधिले किसानको गुनासो नसुन्दा मकै बाली सखाप भएको बताए । ‘हामीले वडा कार्यालयमा पनि मकैबालीमा फौजी किराले पुर्याएको समस्याबारे जानकारी गराइसकेका छौ, अधिकारी भने ‘किसानले लगाएका मकै बाली ७५ प्रतिशतभन्दा बढी सखाप पारिसक्यो, तर वडा कार्यालयले कुनै वास्ता गरेको छैन ।’

तर नगरपालिकाका कृषि प्रसार अधिकृत रामेश्वर श्रेष्ठले भने वडा नम्बर ११ बाहेक अन्य ठाउँबाट आफुहरुलाई कुनै जानकारी नआएको बताए । उनका अनुसार वडा नम्बर ११ मा कतिपय किसानको बारीमा सतप्रतिशतसम्म फौजी किराले मकै सखाप पारेको छ । ‘हामीलाई अन्य वडाहरुबाट फौजी किराले मकैबाली सखाप पारेको भन्ने जानकारी कतैबाट आएको छैन, श्रेष्ठले भने ‘वडा नम्बर ११ मा म आफै ३ पटकसम्म पुगेर किसानलाई विषादी छर्कने र किरा नियन्त्रण गर्ने उपाय सिकाएर आएको छु ।’