धुलिखेल, २४ जेठः नेपाल नगरपालिका संघले लकडाउन अवधिमा गरेका विविधि गतिविधिकोे प्रधानमन्त्री केपी शर्मा ओलीलाई जानकारी गराएको छ । संघका अध्यक्ष एवं धुलिखेल नगरपालिकाका मेयर अशोक ब्याञ्जु सहित पुगेका नगरपालिका संघका पदाधिकारीहरुले जारी लकडाउनमा नगरपालिका संघले गरेको काम अवगत गराएको हो ।

झण्डै २ घण्टा नगरपालिका संघका पदाधिकारीसँग छलफल गरेका प्रधानमन्त्री ओलीले स्थानीय तहले कोरोना भाइरसको रोकथाम र नियन्त्रणका लागि गरेको कामको खुलेर प्रशंसा गरेका थिए । नगरपालिका संघले प्रधानमन्त्रीलाई आगामी आर्थिक वर्ष २०७७÷७८ का लागि संघ सरकारले निर्धाण गरेको बजेट, नीति तथा कार्यक्रमको बारे समेत धन्यवाद दिदँै स्मार्ट सिटी र मेगा सिटी निर्माणका लागि आवश्यक थप रकम हालको बजेटमै ब्यवस्थ ागर्न आग्रह गरेको छ ।

त्यस्तै संघले स्थानीय तहका लागि आवश्यक राहत, स्वास्थ्यकर्मी भत्ता, स्वास्थ्य सामग्री र ब्यवस्थित क्वारेन्टाइनका लागि थप स्रोत परिचालनको ब्यवस्था मिलाइदिन प्रधानमन्त्रीसँग आग्रह गरिएको संघका अध्यक्ष ब्याञ्जुले जानकारी दिए । ‘कोरोना भाइरस संक्रमण रोकथाममा खटिने स्वास्थ्यकर्मीको भत्ता र पर्याप्त स्वास्थ्य सामग्रीका लागि प्रधानमन्त्रीलाई आग्रह गरेको छौँ, अध्यक्ष ब्याञ्जुले भने ‘प्रधानमन्त्रीबाट सकारात्मक जवाफ पाएका छौँ ।’

प्रधानमन्त्री ओलीले खासगरी भारतबाट संक्रमित बढी भित्रिएको र सरकारले संयमतापूर्वक कोरोनाविरुद्ध विभिन्न उपचारात्मक काम गरेको भन्दै आफ्नो स्थानीय तहमा कोरोना संक्रमण नफैलियोस भन्नका लागि थप सजगताका साथ अघि बढ्न समेत स्थानीय तहरुलाई आग्रह गरेका थिए । कोरोनासँगै धेरै नेपाली स्वदेश फर्किने भएकाले सेल्फ आइसोलेसनलाई पनि बढावा दिनुपर्ने प्रधानमन्त्री ओलीको राय थियो ।