धुलिखेल, २३ जेठः कोभिड संकट ब्यवस्थापन केन्द्र (सीसीएमसी) काभ्रेले विदेशबाट फर्कने काभ्रेका नागरिकलाई आफ्नो गन्तब्यसम्म पुर्याउने जिम्मा नेपाली सेनालाई दिएको छ । सीसीएमसीको बैठकले धुलिखेलमा रहेको नेपाली सेनाको विष्णु दल गणलाई गन्तब्यसम्म पुर्याउने जिम्मा दिएको हो ।

आवश्यक सुचना आदान प्रदानगर्न र सहजिकरण गर्न गणका सेनानी प्रकाश कुमार उप्रतिलाई सम्पर्क ब्यक्ति तोकेको स्वास्थ्य कार्यालय काभ्रेका प्रमुख डाक्टर नरेन्द्र कुमार झाले जानकारी दिए । त्रिभुवन विमानस्थलमा ओर्लिएपछि सम्बन्धित पालिकासम्म पुर्याउने सबै काम सेनाले गर्ने छ ।

सीसीएमसीको बैठकले कृषि उत्पादन तथा उत्पादित समाग्री सहज रुपमा दुवानी गर्ने वातावरण मिलाउन सबै स्थानीय तहहरुलाई आग्रह गरेको छ । बैठकले विदेशबाट आउनेलाई स्वैच्छिक रुपमा होटलमा समेत क्वारेन्टाइनका रुपमा बस्ने दिने निर्णय गरेको छ । होटल ब्यवसायीसँग छलफल गरेर क्वारेन्टाइनको ब्यवस्था मिलाउने बैठकले निर्णय गरेको छ ।