धुलिखेल, २२ जेठः बाढीले बगाएको पाइप अझै जडान नहुदाँ काभ्रेको सदरमुकाम धुलिखेलमा खानेपानीको चरम हाहारका मच्चिएको छ । जेठ १४ गते पनौती क्षेत्रमा भिषण बर्षापछि आएको बाढीले धुलिखेल आउने खानेपानीको पाइप बगाएको थियो ।

खानेपानीको पाइप राखिएको जमिन समेत बाढी बगाए थियो । धुलिखेल खानेपानी उपभोक्ता समितिले बाढीले बगाएको ठाउँमा मर्मत काम जारी रहेको बताएको छ । तर एक साता बितिसक्दा पनि मर्मतको काम नसकिएपछि धुलिखेलमा खानेपानीको चरम समस्या सिर्जना भएको हो ।

बाढीले पनौती स्थित बाँसडोल खोलामा धुलिखेल आउने खानेपानीको पाइप बगाएको थियो । पनौती नगरपालिकाको वडा नम्बर १२ कलाती भूमिडाँडाबाट ल्याएको पानीको पाइप बाढी बगाएको हो । एकसाता बितिसक्दा पनि नियमित पानी आउन छोडे पनि उपभोक्ताहरुलाई विभिन्न संघसंस्थाले पानी वितरण गर्न थालेका छन् ।

बाढीले गेटपोलमा समेत क्षति भएकाले तत्काल धुलिखेल स्थित मुख्य ट्याङकीमा खल्सान समस्या भएको खानेपानी उपभोक्ता समितिका अध्यक्ष रामेश्वर श्रेष्ठले बताए । गेटपोल नयाँ फेर्नका लागि प्राविधि टोली पठाइसके उनले बताए ।