धुलिखेल, १३ जेठः खानेपानीको चरम अभाव झेल्दै आएको पाँचखालमा बृहत खानेपानी आयोजना सञ्चालन गर्ने ठेक्केदारको टुंगो लागेको छ । बृहत सुनकोशी खानेपानी आयोजनाको ठेक्का स्वीकृत भएर निर्माण ब्यवसायी समेत छनौट भएको मेयर महेश खरेलले जानकारी दिए ।

ठेक्का स्वीकृत भएसँगै अब छिट्टै आयोजनाको काम अघि बढ्ने मेयर खरेलले बताए । उनका अनुसार मंगलबार आयोजनाको ठेक्का स्वीकृत भएको हो । ‘पाँचखालका नागरिकका लागि यो एउटा ऐतिहासिक दिन हो, मेयर खरेलले भने ‘अब छिट्टै पानीको समस्याबाट हामी मुक्ति पाउने छाैँ ।’

एशियाली विकास बैंक (एडिपी) र नगर विकास कोषको ऋण सहयोगमा आयोजना निर्माण गर्न लागिएको हो । आयोजनामा कुल लागतको ५ प्रतिशत रकम उभोक्ताले सहयोग गरेका छन् । २ अर्ब २० करोड लागतमा सुनकोशी बृहत खानेपानी आयोजना निर्माण पुरा हुनेछ ।

खानेपानी आयोजना साढे २ बर्षभित्र सकिने मेयर खरेलले जानकारी दिए । सुनकोशी नदीको बिमिरे भन्ने ठाउँबाट लिफ्ट गरेर ल्याएको पानी पलाञ्चोक भगवती मन्दिर आसपास बन्ने मुख्य ट्याङकीमा खसालिने छ । त्यसपछि पानी वितरणको काम सुरु हुनेछ ।

नगरपालिकाको वडा नम्बर १, ५ र १३ नम्बर वडा बाहेकका सबै वडाका नागरिकको घर–घरमा बृहत खानेपानी आयोजनाको पानी पुग्नेछ । १३ नम्बर वडामा भने खानेपानी आयोजनाको काम लगभग सकेर घर घरमा पानी पुगेको सकेको मेयर खरेलले बताए । ‘यो आयोजना स्वीकृत हुदाँसम्म जहाँबाट जस जसले सहयोग गर्नुभयो उहाँहरु सबैलाई धेरै धन्यवाद, मेयर खरेलले भने ‘अहिले जसरी सहयोग गरिरहनुभएको छ, आयोजना नसकिदासम्म पनि सहयोगका अपेक्षा गरेको छु ।’