धुलिखेल, १२ जेठः काभ्रेमा हालसम्म १६ सय भन्दा बढी मानिसमा आरडिटी विधि मार्फत कोरोना भाइरसको परीक्षण गरिएको छ । कोभिड संकट ब्यवस्थापन केन्द्र काभ्रेका अनुसार १६ सय ५७ जनाको आरडिटी विधि मार्फत कोरोना परीक्षण गरिएको हो ।

जिल्लामा २१ सय आरडिटी किट रहेको छ । हालसम्म परिक्षण गरिएका मध्ये २७ जनामा आरडिटी परीक्षणमा कोरोना भाइरस संक्रमण देखिएको छ । त्यस्तै जिल्लाका १ सय ७२ जनाको पीसीआर विधि मार्फत कोरोना परीक्षण गरिएको छ । हालसम्म जिल्लामा पीसीआर विधि मार्फत गरिएको परीणमा कुनै पनि ब्यक्तिमा कोरोना भाइरस संक्रमण देखिएको छैन् ।

जिल्लामा सोमबार क्वारेन्टाइन बस्नेको संख्या यथावत रहेको छ । कोभिड संकट ब्यवस्थापन केन्द्र काभ्रेका अनुसार ४३ जना ब्यक्ति क्वारेन्टाइनमा छन् । सबैभन्दा बढी २९ जना धुलिखेल स्थित सञ्जिवनी उच्च माविको क्वारेन्टाइनमा रहेका छन् ।

धुलिखेल अस्पतलामा ७ जना, पाँचखाल र मण्डनदेउपुर नगरपालिकामा २/२ जना क्वारेन्टाइनमा रहेका छन् । त्यस्तै पनौती र तेमालको क्वारेन्टाइनमा १/१ जना रहेको जिल्ला स्वास्थ्य कार्यालय काभ्रेका प्रमुख डाक्टर नरेन्द्र कुमार झाले जानकारी दिए । जिल्लामा ३ सय ४२ बेडको क्वारेन्टाइन तयारी अवस्थामा छ ।