धुलिखेल, ११ जेठः काभ्रेमा क्वारेन्टाइन बस्नेको संख्या बढ्दै गएको छ । आतबारसम्म ४३ जना ब्यक्ति क्वारेन्टाइनमा रहेको कोभिड संकट ब्यवस्थापन केन्द्र काभ्रेले जनाएको छ । सबैभन्दा बढी २७ जना धुलिखेल स्थित सञ्जिवनी उच्च माविको क्वारेन्टाइनमा रहेका छन् ।

प्राप्त वितरण अनुसार उनीहरु सबै लकडाउनको अवधिमा भारतबाट आएका हुन् । धुलिखेल अस्पतलामा ७ जना, पाँचखालमा ४ जना, नमोबुद्ध र मण्डनदेउपुर नगरपालिकामा २÷२ जना क्वारेन्टाइनमा रहेका छन् । त्यस्तै पनौतीको क्वारेन्टाइनमा १ जना रहेको जिल्ला स्वास्थ्य कार्यालय काभ्रेका प्रमुख डाक्टर नरेन्द्र कुमार झाले जानकारी दिए ।

जिल्लामा आरडिटी विधि मार्फत कोरोना भाइरसको परीक्षण दायरा बढाइएको छ । आरडिटीमा कोरोना संक्रमण देखिएका सबैलाई पीसीआर रिपोर्ट नआउँदा सम्म क्वारेन्टाइनमा राख्ने गरिएको छ । धुलिखेल अस्पतालको आइसोलेसन बेडमा आज पनि एक जनाको मात्रै उपचार भइरहेको छ ।

हालसम्म काभ्रेका जिल्लाका १ सय ७२ जनाको पीसीआर विधि मार्फत कोरोना परीक्षण गरिएको छ ।