धुलिखेल, ८ जेठः सिन्धुपाल्चोक जिल्लाको जुगल गाउँपालिकाले कोरोना भाइरस रोकथाम तथा नियन्त्रणका लागि अग्रपंक्तिमा रहेर कामगर्ने सबैको बिमा गरिदिने भएको छ । गाउँ कार्यपालिकाको आकस्मिक बैठकले स्वास्थ्यकर्मीहरु, कर्मचारी र जनप्रतिनिधिहरुको १ लाख बराबरको जोखिम बिमा गर्ने निर्णय गरेको हो ।

त्यस्तै १० लाख बराबरको स्वास्थ्य बिमा गर्ने निर्णय भएको पालिकाका अध्यक्ष होम नारायण श्रेष्ठले जानकारी दिनुभयो । जनप्रतिनिधि बाहेक अन्यको बिमा बापत शुल्क गाउँपालिकाले नै ब्यहार्ने छ । बैठकले सेलाङ मावि, गोल्चे बगर, कालिदेवी मावि पाङताङ, डल्लेपोखरी पाङताङ, रत्नराज्य मावि चनौटे, हगाम र जलदेवी माविमा सुरक्षित आवास स्थल अर्थात क्वारेन्टाइन तयार गर्ने निर्णय पनि गरेको छ ।

बैठकले गाउँपालिकामा बाहिरी ठाउँबाट आउने सबैलाई अनिवार्य १४ दिन क्वारेटाइनमा राख्ने निर्णय समेत गरेको अध्यक्ष श्रेष्ठले बताउनुभयो ।