धुलिखेल, ८ जेठः काभ्रेपलाञ्चोकको भुम्लु गाउँपालिका वडा नम्बर ८ सापिङस्थित सिलामे भीरमा बोलेरो गाडी दुर्घटना हुँदा सुनकोशी नदीमा खसेर बेपत्ता भएका दुईजना मध्ये एकको शव फेला परेको छ । भुम्लु गाउँपालिका वडा नं ४ का बासिन्दा भोला महतको शव फेला परेको जिल्ला प्रहरी कार्यालयका प्रहरी नायब उपरीक्षक कुमारविक्रम थापाले जानकारी दिए ।

बेपत्ता भएका वडा नं १ का २६ वर्षीय अशोक गिरीको नेपाली प्रहरी सशस्त्र प्रहरीको टोलीले खोजी कार्य जारी राखेको छ । हिजो दिउँसो दोलालघाटबाट सिमेन्ट र कुखुराको दाना लिएर सापिङ जादै गरेको बा १६ च ८८३८ नंको सो गाडी अचानक पछाडिको दुईवटै टायर सडकबाट तल खसी दुर्घटनामा परेको थियो ।

गाडीमा सवार सोही ठाउँ बस्ने ३९ वर्षीया सानुमाया गिरीको बायाँ हात भाँच्चिएको र उहाँ उपचारपछि घर फर्किसकेको प्रहरीले जनाएको छ ।