धुलिखेल, ६ जेठः काभ्रेको बेथानचोक गाउँपालिकाले बेलुकाको समयमा मात्रै दुध संकलन र बिक्रि गर्न उर्दी जारी गरेको छ । गाउँ विपद् ब्यवस्थापन समितिको बैठकले दुध, दुग्धजन्य वस्तु संकलन र बिक्री वितरण बेलुकाको सयममा गर्ने निर्णय गरेको हो । बैठकले दुधजन्य वस्तु, खाद्यन्न र निर्माण सामग्री ओसारपसार गर्ने सवारी साधनमा चालक र सहचालक बाहेक बढीमा १ जना ब्यक्ति मात्रै बस्ने पाउने निर्णय पनि गरेको छ ।

गाउँपालिकाको क्षेत्रभित्र विभिन्न नाका मार्फत अपरिचित ब्यक्तिहरु लुकिछिपि प्रवेश गरिरहेको गुनासो बढेको भन्दै त्यसरी प्रवेश गर्ने नागरिकलाई पालिकाको जिम्मा लगाइदिन बैठकले आग्रह गरेको छ । त्यस्तै ब्यक्तिलाई २ हप्तासम्म क्वारेन्टाइनमा अनिवार्य राख्ने निर्णय भएको पालिका प्रमुख प्रशासकीय अधिकृत कृष्ण प्रसाद सापकोटाले जानकारी दिए ।

त्यस्तै विपद् ब्यवस्थापन समितिले पालिकाभित्रका सबै बजारहरुमा ३ जनाभन्दा बढी भेला नहुन अनुरोध गरेको छ । खाद्यन्न र मेडिकल जस्ता अत्यावश्यक सेवा बाहेकका अन्य कुनै पनि पसल नखोल्न पनि समितिले आग्रह गरेको छ । कोरोना भाइरससँग मिल्दोजुल्दो कुनै लक्षण देखा परे तत्काल स्वास्थ्य संस्थामा सम्पर्क गर्न पनि बैठकले आग्रह गरेको प्रमुख प्रशासकीय अधिकृत सापकोटाले बताए ।