धुलिखेल, ४ जेठः दुई ठूला अस्पताल रहेको काभ्रेमा पहिलो पटक शव बहान सञ्चालनमा ल्याइने भएको छ । जिल्ला कमाण्ड पोष्टले पहिलो पटक शव बहान सञ्चालनमा ल्याउने निर्णय गरेको हो । शीर मेमोरियल अस्पताल बनेपाले रेडक्रस काभ्रे शाखालाई दिएको एम्बुलेन्स शव बहानका रुपमा प्रयोग गर्ने निर्णय भएको हो ।

जिल्लामा ३५ वटा एम्बुलेन्स भएपनि हालसम्म एउटा पनि शव बहान थिएनन् । आइतबार बसेको कमाण्ड पोष्टको बैठकले शव बहान सञ्चालनमा ल्याउने निर्णय गरेको जिल्ला स्वास्थ्य कार्यालय काभ्रेका प्रमुख एवं कमाण्ड पोष्टका सदस्य सचिव डाक्टर नरेन्द्र कुमार झाले जानकारी दिए । कोरोना भाइरसको संक्रमणबाट धुलिखेल अस्पतालमा एक महिनाको मृत्युपछि शव बहान सञ्चालनमा ल्याइएको हो ।

कोरोना संक्रमणबाट मृत्यु भएकी महिलाका श्रीमान सहित काभ्रेमा हाल २३ जनालाई क्वारेन्टाइनमा राखिएको छ । उनीहरु सबैको पीसीआर विधि मार्फत कोरोना भाइरस परीक्षण भइरहेको डाक्टर झाले बताए । हालसम्म काभ्रे जिल्लाका मात्रै १ सय ३६ जनाको पीसीआर विधि मार्फत कोरोना भाइरसको परीक्षण गरिएको छ ।