धुलिखेल, २८ बैशाखः पाँचखाल नगरपालिकाको वडा नम्बर ९ ले दोस्रो चरणको राहत विरतण सुरु गरेको छ । आइतबारबाट दोस्रो चरणको राहत वितरण सुरु गरिएको वडाध्यक्ष किरण श्रेष्ठले जानकारी दिए ।

बिपन्न, गरिब, अशक्त, अपाङ्ग र दैनिक ज्यालामजदुरी गर्ने घर परिवारहरुलाई राहत वितरण सुरु गरिएको हो । यसअघि वडाले पहिलो चरणमा ६० घर परिवारलाई नगरपालिकाले उपलब्ध गराएको राहत हस्तान्तरण गरेको थियो । त्यस्तै अन्य विभिन्न संघसंस्थाको सहयोगमा थप १५० घर परिवारलाई पहिलो चरणको राहत दिइएको थियो ।

यो पटक वडा कार्यालयमा राहतका लागि ३ सय ३० घर परिवारको निबेदन आएको र ती सबै घरपरिवारहरुलाई भोलि सम्म वितरण गरिसक्ने वडाध्यक्ष श्रेष्ठले बताए । वडाध्यक्ष श्रेष्ठका अनुसार राहत प्याकेजमा चामल १० केजी, दाल २ केजी, तेल १ लिटर, नुन १ केजी र मस्यौरा आदा केजी दिएको छ ।

भुकम्पपछि लिइएको तथ्याङ्क अनुसार यो वडामा ११ सय भन्दा बढी घरधुरी संख्या रहेको छ ।