धुलिखेल, २४ बैशाखः काभ्रेको मण्डनदेउपुर नगरपालिकाले नगरभित्रका सबै सामुदायिक विद्यालयका कार्यालय सहयोगीको मासिक तलब बृद्धि गर्न सिफारिस गरेको छ । नगरपालिकाको शिक्षा समितिले आगामी आर्थिक वर्ष २०७७/७८ देखि बालविकास केन्द्रमा कार्यरत सहयोगी कार्यकर्ताको मासिक पारिश्रमिक १३ हजार ५ सय रुपैयाँ पुर्याउन नगरसभा समक्ष सिफारिस गरेको छ ।

मण्डनदेउपुर नगरपालिकाका नगरप्रमुख एवं नगर शिक्षा समितिका अध्यक्ष टोकबहादुर वाइवाको संयोजकत्वमा बसेको बैठकले नगरसभालाई सिफारिस गरेको हो । नगर शिक्षा समितिले माध्यमिक तहका कार्यालय सहयोगीको पनि मासिक पारिश्रमिक १३ हजार ५ सय पुर्याउन सिफारिस गरेको छ ।

यसअघि संघीय सरकारले सहयोगी कार्यकता र माध्यमिक तहका कार्यालय सहयोगीको मासिक पारिश्रमिक ६ हजार तोकेको थियो । नगर शिक्षा समितिले माध्यमिक तहमा कार्यरत लेखा सहायकको हालको तलब ११ हजार ५ सयबाट १५ हजार पुर्याउन सिफारिस गरेको छ । त्यस्तै बाल कक्षा देखि ८ सम्म चलेका आधाभुत विद्यालयका सहयोगिको हालको मासिक तलब ४ हजारमा र ४५ सय गर्न सिफारिस गरिएको छ ।

नगर शिक्षा समितिले सबै कर्मचारीलाइ अरु शिक्षक सरह बार्षिक १० हजार पोशाक भत्ता पनि थप गर्न सिफारिस गरेको छ । नगर शिक्षा समितिले गरेको सिफारिस कार्यपालिका बैठलले अनुमोदन गरेको र नगरसभाले पारित गरेपछि कार्यान्वयनमा आउने प्रमुख प्रशासकीय अधिकृत प्रणराज न्यौपानेले बताए ।

नगर भित्र ४३ वटा सामुदायिक बिद्यालय रहेका छन् । ‘नगर शिक्षा समितिले सिफारिस गरेको प्रस्ताव कार्यपालिका बैठकले अनुमोदन गरेको छ, प्रमुख प्रशासकीय अधिकृत न्यौपानेले ‘अब नगरसभाले पारित गरेपछि कार्यान्वयनमा आउँछ ।’